Hoe om ou verf van meubels te stroop

Daar is verskeie maniere om ou verf van meubels te stroop.

• ·         Stroop met die hand of met ‘n elektriese skuurmasjien

• ·         Stroop met ‘n chemiese verfstroper

• ·         Stroop met hitte

Gebruik van skuurpapier

Die verwydering van ou verf is soms noodsaaklik voordat jy met ‘n nuwe laag verf begin. Dit is veral noodsaaklik as die ou verflaag reeds begin skif of kraak. Dit is belangrik om die regte skuurpapier te gebruik. Die verkeerde keuse kan die hout beskadig of dit kan dit moeilik maak om die verf te verwyder.

Die algemene beginsel is om eers met ‘n growwer skuurpapier te begin en dit dan met ‘n fyner papier op te volg om die skuurmerke van die growwer papier te verwyder. Ek hou daarvan om met ‘n 80 of 100 grint papier te begin en dan met ‘n 220 grint of selfs fyner af te rond. Die doel is natuurlik om die hout oppervlak so glad as moontlik te kry. Onthou die verf sal nie die swak afwerking verberg nie – selfs al word dit gespuitverf. Die goue reël is “begin glad, eindig glad”.

Die regte metode is om altyd in die rigting van die houtgrein te werk. Wanneer jy met groot, plat oppervlaktes werk moet ‘n skuurblok verkieslik gebruik word om te verseker dat ‘n egalige skuuraksie gebruik word. 

Skuur met die hand is maar altyd ‘n tydrowende besigheid en dit vereis nogal geduld. Daarom is dit maar die beste om dit meganies met ‘n skuurder te doen. Dit is ongelukkig so dat daar sekere areas is soos hoekeis, ronde oppervlaktes ens. wat net met die hand gedoen kan word. My uitgangspunt is altyd om te kyk of jy nie kan wegkom daarmee om so min as moontlik te skuur nie. Die probleem is egter dat wanneer jy met ou meubels werk dit bykans altyd so is dat die ou verf ‘n oliebasis het en dan kan jy nie met waterverf direk daaroor verf nie want die olie slaan geel kolle deur die bolaag. Die oliebasis verf moet dus of verwyder word of geseël word voordat jy waterbasis verf aanwend.

Wanner jy skuurpapier koop moet jy daarop bedag wees dat daar spesifieke papier is vir hout en ander vir metaal. Daarbenewens kry jy ook nog droë- en nat skuurpapier. Vir houtwerk, gebruik liefs droë skuurpapier wat spesifiek vir hout geskik is.

Chemiese verfstroper

Chemiese verfstroper is ongetwyfeld die maklikste en vinnigste manier om ou verf te stroop. Daar is twee tipes beskikbaar – oliebasis en waterbasis. Die waterbasis het ongetwfeld baie meer voordele en my persoonlike keuse is die waterbasis tipe omdat:

• ·         Dit is baie veilger om te gebruik want dit affekteer nie die oë en hande so erg nie

• ·         Dit is bykans reukloos

• ·         Toerusting word maklik met water gewas

• ·         Bevat nie skadelike stowwe soos etileen chloried nie en is nie flambaar nie.

Dit is redelik maklik om te gebruik en jy hoef slegs die vervaardiger se voorskrifte te volg. In Suid Afrika vervaardig Plascon ‘n waterbasis stroper wat my gunsteling is. Dit is ‘n dik jel en kleef goed aan vertikale oppervlaktes. Die jel word mildelik met ‘n kwas aangewend en dan vir 10 tot 20 minute gelos om sy werk te doen. Sodra die verf begin krummel, neem jy ‘n verf skraper en skraap die verf so goed as moontlik weg. Onthou dis maar ‘n morsige besigheid en dit is raadsaam om ‘n geskikte houer byderhand te hê om die verf te in te stort. Dit is soms nodig om ‘n tweede laag op te sit . Sodra die meeste verf af is, is die finale stap om die stroper te neutraliseer met water voordat die gelaat word om droog te word. Ek neem ‘n gewone potskraper en verwyder die laaste bietjie verf en dis veral handig vir daardie plekkies wat andersins moeilik bereikbaar is. Neem dan ‘n natlap en vee die oorblywende stroper weg.

Nadat die hout behoorlik droog is, kan dit met skuurpapier afgewerk word tot ‘n gladde oppervlakte. Die stroop proses veroorsaak soms dat die houtgrein loskom en fyn “haartjies”op die oppervlak vorm. In so ‘n geval moet die hout eers met ‘n “sanding sealer” behandel word.

Stroop met hitte

Daar is hoofsaaklik twee stukke gereedskap vir hitte stroping – die sogenaamde “heat gun” en die blaasvlam (“blow torch”). Die grootste verskil is dat die blaasvlam ‘n oop vlam het en die “heat gun” blaas warm lug soos ‘n haardroër oor die oppervlakte. Die blaasvlam is natuurlik baie meer agresief en dit moet baie versigtig hanteer word om te verhoed dat die hout brand. Na my mening is dit nie eintlik geskik om verf van meubels te verwyder nie – veral as dit ‘n waardevolle stuk is. Die warm lug blaser werk meer sagkens en sal nie sommer die hout beskadig nie.

Met enige van die twee stukke gereedskap moet dit omtrent 150 tot 200 mm van die oppervlakte gehou word. Dit moet gedurig beweeg want sodra jy dit stil hou gaan die hout beskadig. Sodra die verf begin smelt moet dit met ‘n verfskraper verwyder word.

Verf sonder om ou verf te verwyder

Daar is natuurlik die alternatief om direk oor die ou laag te verf. As dit ‘n waterbasis verf is, kan jy direk daaroor verf. As dit ‘n oliebasis is kan die volgende stappe geneem word:

·         Was die oppervlakte met ‘n oplossing van suikerseep om vullis en olierigheid te verwyder.

·         Sodra dit droog is word die oppervlakte met ‘n 220 grint skuurpapier liggies geskuur

·         Nou word die hout geseël met ‘n waterbasis seeler soos Plascon se Glaze Coat

·         Wend nou die bolaag met waterbasis verf aan

Indien geel merke steeds deurslaan, seël weer en verf dan.

Toets om vas te stel of dit water- of oliebasis verf is

‘n Maklike toets is om vas te stel of dit ‘n oliebasis verf is, is om gewone spiritus op ‘n lap te sit en dit op die oppervlakte te vryf. As die lap met die verf verkleur of die verf sag word, is dit ‘n waterbasis verf. As niks gebeur nie is dit waarskynlik ‘n oliebasis verf.

 Kry verdere inligting

As jy belangstel om meer te weet van die restourasie van ou meubels en hoe om dit te spuitverf kan jy gerus my boek "Refinishing Old Furniture - start a home business." by T N van der Walt op Amazon gaan kry.

Geverfde meubels

Toonbank met maroon bolaag en lig groen onderlaag.

Ek is die afgelope 5 jaar doenig met die restorasie en verf van ou meubels en kombuiskaste. Ek maak hoofsaaklik van 'n kompressor en drukspuit gebruik maar met sommige verftegnieke kan jy nie anders as om 'n verfkwas te gebruik nie. Daar is natuurlik 'n groot verskeidenheid verftegnieke maar ek gebruik hoofsaaklik tegnieke soos veroudering (distressing) en "layering" waar meer as een kleur op mekaar geverf word en die boonste op sommige plekke weg geskuur word om die onderste laag te wys.

Rottang en "wicker" meubels verf ook baie goed - veral met spuitverf. Die lugdruk spuit kom maklik tussen al die gleufies in en werk vinnig en die verf dek maklik op rottang.

Wicker stoel in wit

Die stoel op die foto was in 'n swak toestand en die gevlegde ratan het plek-plek al begin swart word. Die stoel is dus eers behoorlik met suikerseep gewas om al die stof en aanpaksels weg te kry. Daarna is die stukke rattan wat los gegaan het met 'n krammasjien vas gekram. Die eindresultaat was ongelooflik.

Rottang stoele in wit

Die rottangstoele en tafeltjie was ook in 'n swak toestand maar met 'n bitejie geduld en my spuit kon ek hulle weer nuwe lewe gee.

Voordat jy daaraan dink om van die ou afgeleefde meubelstuk ontslae te raak, kan jy dit gerus probeer verf. Dit is maklik en die ou stuk sal weer soos nuut lyk.

Die Beste Masker Vir Spuitverf

3M Half Masker

Omdat spuitverf skadelik kan wees as jy die verfsproei sou inasem, is dit absoluut noodsaaklik dat jy ‘n goeie gesigmasker sal dra. Daar is natuurlik baie soorte op die mark maar die belangrikste is dat dit geskik moet wees vir spuitverf. Dit beteken dat die filterkasette in staat moet wees om organiese gasse en verfdampe te kan absorbeer en om stofdeeltjies te kan opvang voordat jy dit inasem. Dit is ook ablsoluut noodsaaklik dat daar genoegsame ventilasie van lug moet wees in die verflokaal sodat verfsproei weggevoer kan word. Maak dus seker dat jy deure en vensters oopmaak of gebruik ‘n waaier om die lug uit die ruimte te suig.

Soorte gesigmaskers

Die mees algemene tipe maskers is die volgende:

Lugsuiweringsmasker (Air purifying respirator of APR)

Lugvoorsieningsmasker ( Air supplied respirator of SAR)

Die eerste tipe werk met filterkasette wat gevul  is met absorberende materiaal soos koolstof korrels wat in staat is om gasse te absorber. Party bevat ook ‘n stof filter wat saam met die kasset ge-installeer word.  Die maskers pas gewoonlik styf op jou gesig en verhoed die insyfering van lug langs die kante. Die volgende soorte lugsuiweringsmaskers is beskikbaar:

                Kwart masker – bedek slegs die neus en mond.

                Half masker – bedek die ken, neus en mond.

                Vol masker – bedek die hele gesig. Dit beskerm ook die oë.

Die tweede tipe masker ( lugvoorsieningsmasker) maak gebruik van 'n kompressor om lug direk in die masker in te voer.  Dit is belangrik dat die lug wat voorsien word aan minimum standaarde vir suiwer lug en voginhoud moet voldoen. Die tipe stelsel is meestal vir groot spuitverf toepassings en ek sou dit nie vir DIY of klein werke aanbeveel nie. Die vol- en half maskers is meer as voldoende vir ‘n tuisbesigheid.

Masker onderhoud

Filters moet gereeld nagegaan word om te verseker dat dit lugdig pas en dat die filters nog goed funksioneer. Die filters het ‘n beperkte leeftyd en moet vervang word sodra dit nie meer die verfdampe absorbeer nie. Sodra die filter versadig is sal jy dit dadelik agterkom omdat jy die verf sal ruik of proe terwyl jy die masker op het. Die beste is om die voorskrifte van die vervaardiger streng te volg. Na my mening is die 3 M maskers by verre die beste en alhoewel hulle heelwat duurder is as meeste ander make, sal jy in die lang duur die beste diens van hierdie maskers kry.

Omdat die filters duur is, kan jy in die versoeking kom om hulle so lank as moontlik te gebruik maar dit moet vervang word op basis van die volgende oorwegings:

 Sodra jy die verf kan ruik of proe.

             Wanneer dit gereeld gebruik word moet dit na 40 uur gebruik vervang word.

             Vervang die filters as die vervaldatum bereik word.

             Vervang die filters na 6 maande selfs al was dit nooit gebruik nie.

Nuwe filters moet in die lugdigte verpakking gehou word totdat dit gebruik word. Die rede hiervoor is dat die koolstof gasse uit die atmosfeer absorbeer selfs al is dit nie in werking nie.

Aanbeveling

Ek sal dus aanbeveel dat jy in ‘n half- of volgesig 3M masker belê en dat jy die bruin filterkasset gebruik wat spesifiek bedoel is om verfdampe en stof te filtreer. Dit is nie die moeite werd om die goedkoper tipes te gebruik nie want jou gesondheid kan op die lang duur daaronder lei.

Onthou dat as jy ‘n half gesig masker gebruik, moet jy ook jou oë beskerm deur ‘n geskikte veilgheidsbril te dra.

Indien jy meer inligting oor maskers en ander veiligheidstoerusting verlang, kan jy my gerus kontak deur ‘n e-pos te stuur.

Kies die regte kompressor vir spuitverf

As jy ernstig is oor die spuitverf van meubels en kaste, moet jy die regte lug  kompressor aanskaf wat genoeg saamgeperste lug sal verskaf om die spuit doeltreffend te laat funksioneer. Daar is baie soorte kompressors op die mark. Vir spuitverf sal die tipe kompressor afhang van die tipe spuit wat jy gaan gebruik. Wanneer jy ‘n spuit aanskaf moet jy kyk na die gemiddelde lug verbruik in KVM ( kubieke voet per minuut) of Liter/minuut asook na die werkdruk (Bar of psi – “pounds per square inch”) waarmee die spuit teen optimum sal spuit. Die kompressor moet dus minstens die gevraagde lug volume en druk kan verskaf – ook genoem FAD of “free air delivery”. Onthou dat gravitase spuite minder lugdruk benodig as suig spuite. Die mees algemene spuit wat vir meubels gebruik word is die sgn. HVLP (“ high volume low pressure”) spuite. Dit spuit ‘n hoë volume verf teen ‘n lae druk. Maak dus seker dat die kompressor ‘n hoë volume lug kan produseer.

Daar is hoofsaaklik twee tipes lug kompressors. Die direkte aangedrewe kompressor en die belt aangedrewe kompressor. Eersgenoemde is meer bedoel vir stokperdjie beoefenaars terwyl die tweede meer geskik is vir werkswinkel toepassings. 

Die direkte aangedrewe kompressors is gewoonlik heelwat goedkoper as die belt kompressors en is geskik vir lae volume werk teen laer lugdruk. Die belt kompressors lewer meer saamgeperste lug teen hoër druk maar is ook heelwat duurder.  Die eersgenoemde het natuurlik ook ‘n kleiner tenk (gewoonlik 50 liter) terwyl die belt kompressor kom met tenks wat wissel van 100 liter tot meer as 200 liter.

Om die regte grootte te kies moet jy dus hoofsaaklik na die volgende twee aspekte kyk:

1.      Die lewering van lug in kvm of psi. Die kleiner kompressors kom gewoonlik met ‘n twee perdekrag motor en lewer 7 kvm. ‘n Drie PK motor lewer ongeveer 10 kvm.

2.      Die grootte van die lugtenk. Die 50 liter hou nie veel lug nie en as jy redelik groot oppervlaktes gaan spuit, moet jy soms wag met die spuit totdat die tenk weer op kapasiteit is. Die 100 liter hou genoeg lug om redelik ver te spuit voor die tenk se kapasiteit te laag raak. As jy ‘n 3 PK motor het, sal dit die tenk weer binne ‘n minuut of wat op kapasiteit kry terwyl jy kan aanhou om te spuit.

As jy ‘n beginner is en nie te veel spuitwerk gaan doen nie ( ongeveer 5-10 uur per week) en jy gebruik ‘n standard HVLP gravitasie spuit, sal ek aanbeveel dat jy begin met ‘n goedkoop 2 PK kompressor met ‘n 50 liter tenk. Die voordeel van die kleiner kompressor is dat dit natuurlik baie ligter is en dus maklik vervoer kan word – veral as jy op die terrein moet werk. 

As jy meer gevorderd is met spuitwerk en jy sp

100 L kompressor 3 PK motor

uit gereeld redelik groot oppervlaktes ( veral kombuiskaste en groot meubels) sal ek beslis aanbeveel dat jy gaan vir die 3 PK motor met 100 liter tenk. Dit is wel duurder maar jy gaan soveel meer gedoen kry en werk van ‘n hoë gehalte kan lewer.

MAAK GELD MET OU MEUBELS

Is dit regtig moontlik om geld te maak met ou, afgeleefde meubels? Die antwoord is ja, beslis! Ek het na my aftrede begin om ou meubels te restoureer en oor te verf of vernis en wat as ‘n stokpedjie begin het is nou ‘n betalende besigheid. Daar is egter ‘n paar basiese dinge wat jy reg moet doen om sukses te behaal. 

Daar is basies twee maniere om met ou meubels geld te maak. Die eerste is dat jy items kan aankoop om na restourasie weer te verkoop. Dit is pad wat met ‘n styl leerkurwe gepaard gaan en waar jy ook maklik geld kan verloor. Die tweede is om ander mense se ou meubels vir hulle te restoureer en so ‘n inkomste te verdien. Dit is baie minder riskant en alhoewel dit tyd vat om ‘n behoorlike kliëntebasis op te bou, is dit die pad wat ek sou aanbeveel. Dit het ook die verdere voordeel dat dit jou die geleentheid bied om jou vaardigheid te verbeter en om so groter projekte aan te pak. Die vraag is natuurlik hoe jy jou kliëntebasis kan uitbrei. 

Daar is baie maniere om in die restourasie bedryf betrokke te raak Die eerste is natuurlik jou familie en vriende. As jy met hulle begin kan jy redelik maklik ‘n portefeulje opbou sodat jy dit vir verdere bemarking kan aanwend. Die volgende tipe besighede kan potensiële kliënte wees.

Binnehuis versierders

Dikwels het hulle kliënte ou meubels wat nie aanpas by die nuwe decór wat die ontwerper aanbeveel nie en moet die ontwerper óf nuwe meubels aanbeveel óf moet dit oor geverf word om aan te pas. Dit skep ‘n unieke geleentheid om jou vaardighede te bemark. As jy in jou omgewing  binnehuis versierders het sal dit jou beslis loon om ‘n goeie verhouding met hulle aan te knoop. Dit kan ‘n bestendige werkvloei vir jou verseker.

Tweedehandse meubelwinkels

Gerestoureerde ou riempiesbank

Daar is baie tweedehandse winkels wat ou meubels inkoop wat gerestoureer moet word en soms het hulle nie die interne vermoë om sulke werk te doen nie.

Kombuiskas vervaardigers

Daar is deesdae ‘n groeiende vraag na geverfde kombuiskaste en baie vervaardigers (veral die kleineres) het nie die kundigheid om professionele verfwerk (spuitverf) self te doen nie. Weereens kan samewerking met so ‘n besigheid baie lonend wees en kan dit jou besigheid tot nuwe hoogtes vat. Ek sou egter dit nie aanbeveel voordat jy nie die vaardigheid van spuitverf tegnieke deeglik onder die knie het nie. 

Op grond van my eie ervaring in hierdie bedryf, het ek ‘n e-boek “Refinish Old Furniture – start a home business” ( ook in gedrukte vorm beskikbaar) saamgestel wat jou kan help om die nodige vaardighede aan te leer en om jou te help met die ontwikkeling van jou besigheid. Kontak my gerus per e-pos vir verdere besonderhede.

Spreuke 14: 4

As daar nie osse is nie, bly die voerkrip leeg.

Met net een goeie os bring jy ʼn groot oes in.